Códigu de conducta

La comunidá de Fedora fórmenla un mestu de profesionales y voluntarios de tol mundu que trabayen en cada aspeutu de la distribución, dende la programación hasta’l marketing. La diversidá ye unu de los nuesos puntos fuertes pero tamién pue causar descontentu y llevar a problemes. Poro, tenemos dalgunes regles básiques que pidimos a la xente que siga cuando tean usando los recursos de proyeutu.

Esto nun ye una llista detallada de coses que nun pues facer. En vez d’eso, tómalo col propósitu col que se creó: una guía p’acencellar un tratu escelente pa colos demás.

  • Sé educáu. El to trabayu van usalu otres persones y tu, al empar, vas depender del d’otros. Cualesquier decisión que tomes va afeutar a usuarios y compañeros polo que deberíes tener eses consecuencies en mente cuando tomes decisiones.

  • Sé respetuosu. Non tol mundu ta d’alcuerdu tol tiempu pero’l desalcuerdu nun ye escusa pa un comportamientu malu y faltosu. En dalgún puntu, toos sufrimos frustración pero nun podemos dexar que se convierta nun ataque personal. Ye importante recordar qu’un comunidá onde la xente se sienta incómodo o amenazao nun ye productiva. Los miembros de la comunidá de Fedora deberíen ser respetuosos cuando traten con otros collaboradores, usuarios de Fedora o xente de fuera.

Cuando teamos en desalcuerdu vamos tentar d’entender el porqué. El desalcuerdu, social y téunicu, asocede tol tiempu y Fedora nun ye la esceición. Ye importante solucionar les diferencies dende puntos de vista constructivos.

Recuerda que somos diferentes. La fortaleza de Fedora vien de la so comunidá variada, xente con una trayeutoria estremada que tien otres prespeutives énte los problemes. Que nun seyas a entender a daquién nun quier dicir que tea enquivocáu. Nun escaezas qu’errar ye d’humanos y echa-y la culpa a otros nun nos lleva a nenyures, lo meyor ye echar un gabitu pa iguar los problemes y deprender de los fallos.

Si fuesti testigu o formesti parte d’un eventu que violó esti códigu, informa d’ello abriendo un informe priváu nel Depósitu de Códigu de conducta. Esti informe debería incluyir la descripción del eventu y cualesquier información relevante. L’informe van remanalu’l Líder del proyeutu Fedora y el Coordinador d’impautu y aición de la Comunidá de Fedora xunto con otros miembros de la Xunta de Fedora y l’Equipu llegal de Fedora/Red Hat como seya afayadizo.

Si tienes cualesquier entruga o comentariu tocante a esti códigu, abri un informe nel depósitu de Xunta de Fedora.