ວິທີການເປັນຜູ້ປະກອບສ່ວນທີ່ປະສົບຜົນສຳເລັດ

ຄຳຖາມທີ່ສຳຄັນແມ່ນ: ເຮົາຈະໄດ້ຫຍັງຈາກການເປັນອາສາມັກຄີ?

ການອາສາມັກຢູ່ບ່ອນໃດກໍຕາມໃນໂຄງການທີ່ເຈົ້າສົນໃຈ ສາມາດໃຫ້ຜົນຕອບແທນທີ່ດີຫຼາຍ. ຍົກຕົວຢ່າງ ກັບ Fedora, ການແນະນຳໃຫ້ຄົນໃໝ່ຮູ້ຈັກກັບຊອບແວເສລີ/ໂອເພັນຊອດ ແມ່ນໃຫ້ຄວາມພໍໃຈຢ່າງຫຼວງຫຼາຍ.

ແນວໃດກໍຕາມ, ຄວາມພໍໃຈສ່ວນຕົວໃນການເຮັດສິ່ງທີ່ພວກເຮົາເຊື່ອໝັ້ນ ບໍ່ແມ່ນສິ່ງດຽວທີ່ພວກເຮົາໄດ້ຮັບເປັນການຕອບແທນ. ໂດຍການເຮັດວຽກຮ່ວມກັນຢ່າງເປີດເຜີຍ, ພວກເຮົາສະມາຊິກໃນຊຸມຊົນໄດ້ແລກປ່ຽນທັດສະນະ, ປະສົບການ, ຄວາມຮູ້, ທັກສະ ແລະ ຊັບພະຍາກອນເຊິ່ງກັນແລະກັນ. ພວກ ເຮົາສ່ວນໃຫຍ່ໄດ້ຮຽນຮູ້ ແລະ ປັບປຸງທັກສະຕ່າງໆ ໃນຂະນະທີ່ປະກອບສ່ວນເຂົ້າໃນຊຸມຊົນ. ພວກເຮົາຍັງໄດ້ຮຽນຮູ້ກ່ຽວກັບວັດທະນະທຳ ແລະ ປະສົບການອື່ນໆ ຈາກເພື່ອນສະມາຊິກໃນຊຸມຊົນ.

ທັງໝົດນີ້ຍັງເປັນປະໂຫຍດຫຼາຍໃນດ້ານການເຮັດວຽກມືອາຊີບ, ເພາະວ່າມັນຊ່ວຍສະແດງໃຫ້ເຫັນເຖິງທັກສະທີ່ເປັນທີ່ຕ້ອງການຢ່າງສູງໃນອຸດສາຫະກຳ ເຊັ່ນ: ການຮ່ວມມື, ທັກສະທາງດ້ານເຕັກນິກ, ປະສົບການໃນໂລກຕົວຈິງ ແລະ ການບໍລິຫານຈັດການ, ແລະ ອື່ນໆອີກ.

ກະລຸນາຮັບຊາບວ່າ ສິ່ງເຫຼົ່ານີ້ບໍ່ໄດ້ມາແທນທີ່ເງິນເດືອນ ຫຼື ລາຍໄດ້. ເຖິງແມ່ນວ່າຊຸມຊົນຈະມີການສະໜັບສະໜູນສະມາຊິກໃນການຈັດງານ ແລະ ເຂົ້າຮ່ວມກິດຈະກຳຕ່າງໆຂອງຊຸມຊົນ, ແຕ່ບໍ່ມີຜົນຕອບແທນທາງດ້ານການເງິນສຳລັບການມີສ່ວນຮ່ວມ. ດັ່ງນັ້ນ, ການຈັດສັນເວລາເພື່ອໃຫ້ແນ່ໃຈວ່າວຽກ ແລະ ດ້ານອື່ນໆຂອງຊີວິດບໍ່ໄດ້ຮັບຜົນກະທົບແມ່ນສິ່ງສຳຄັນທີ່ສຸດ. ສາມາດອ່ານເພີ່ມເຕີມກ່ຽວກັບເລື່ອງນີ້ໄດ້ໃນພາກຕໍ່ໄປ.

ຄວາມສົມດຸນລະຫວ່າງວຽກ ແລະ ຊີວິດແມ່ນສຳຄັນທີ່ສຸດ. ໃນກໍລະນີສ່ວນໃຫຍ່, ມັນແມ່ນເວລາຫວ່າງຂອງເຈົ້າຫຼັງຈາກເລີກວຽກ, ເວລາທີ່ເຈົ້າສາມາດໃຊ້ກັບຕົວເອງ, ໝູ່ເພື່ອນ ແລະ ຄອບຄົວ, ທີ່ເຈົ້າຫຼຸດຜ່ອນລົງເພື່ອມາເປັນອາສາມັກຄີ. ດັ່ງນັ້ນ, ຈົ່ງບອກໃຫ້ໝູ່ເພື່ອນ ແລະ ຄອບຄົວຂອງເຈົ້າຮູ້ວ່າເຈົ້າກຳລັງເປັນອາສາມັກຄີ, ແລະ ໃຫ້ແນ່ໃຈວ່າເຈົ້າຍັງຄົງມີເວລາໃຫ້ພວກເຂົາຢູ່.

ຖ້າເຈົ້າມີແຜນທີ່ຈະປະກອບສ່ວນໃນລະຫວ່າງຊົ່ວໂມງເຮັດວຽກ, ເຈົ້າຄວນປຶກສາກັບນາຍຈ້າງເພື່ອຢືນຢັນວ່າເຈົ້າສາມາດເຮັດໄດ້, ເຖິງແມ່ນວ່າຈະເປັນພຽງແຕ່ສອງສາມຊົ່ວໂມງໃນຕອນບ່າຍວັນສຸກກໍຕາມ. ວຽກສ່ວນໃຫຍ່ຈະສົ່ງເສີມການປະກອບສ່ວນໃຫ້ຊຸມຊົນ, ໂດຍສະເພາະຖ້າມັນກ່ຽວຂ້ອງຢ່າງໃກ້ຊິດກັບທັກສະ ແລະ ໂຄງການທີ່ກ່ຽວຂ້ອງກັບວຽກ. ແນວໃດກໍຕາມ, ມັນອາດຈະບໍ່ເປັນແບບນັ້ນສະເໝີໄປ.

ການອາສາມັກຄວນຈະເປັນປະໂຫຍດຕໍ່ທຸກຝ່າຍທີ່ກ່ຽວຂ້ອງ, ດັ່ງນັ້ນການມີຄວາມຊັດເຈນກ່ຽວກັບຂໍ້ກຳນົດ ແລະ ຜົນປະໂຫຍດຂອງການອາສາມັກຈຶ່ງເປັນສິ່ງສຳຄັນ.

ການເຮັດວຽກຮຽກຮ້ອງໃຫ້ມີການແບ່ງເວລາເພື່ອເຮັດສິ່ງຕ່າງໆ. ອາສາມັກຄີບາງຄົນອາດໃຊ້ເວລາ 4 ຊົ່ວໂມງຕໍ່ອາທິດ, ໃນຂະນະທີ່ບາງຄົນອາດໃຊ້ເວລາຫຼາຍກວ່າ 15 ຊົ່ວໂມງຕໍ່ອາທິດໃນການປະກອບສ່ວນ. ມັນບໍ່ມີຕົວເລກທີ່ຖືກຕ້ອງແນ່ນອນ. ພວກເຮົາບໍ່ໄດ້ແຂ່ງຂັນກັນວ່າໃຜຈະເຮັດຫຼາຍກວ່າ, ແລະ ບໍ່ໄດ້ຮູ້ສຶກບໍ່ດີຖ້າພວກເຮົາບໍ່ສາມາດໃຫ້ເວລາໄດ້ຫຼາຍເທົ່າກັບເພື່ອນສະມາຊິກຄົນອື່ນ. ສຳລັບອາສາມັກຄີສ່ວນໃຫຍ່ທີ່ມີວຽກປະຈຳ, ການອາສາມັກ 10 ຊົ່ວໂມງ ຫຼື ຫຼາຍກວ່ານັ້ນຕໍ່ອາທິດແມ່ນຍາກທີ່ຈະຮັກສາໄວ້ໄດ້. ດັ່ງນັ້ນ, ບໍ່ວ່າເຈົ້າຈະເຮັດຫຍັງ, ປະລິມານທີ່ເຈົ້າສາມາດຈັດການໄດ້ແມ່ນຖືວ່າດີແລ້ວ.

ກົດທົ່ວໄປແມ່ນໃຫ້ເລີ່ມຕົ້ນຈາກສິ່ງນ້ອຍໆ, ປະເມີນເວລາທີ່ເຈົ້າມີໃຫ້ໜ້ອຍ, ແລະ ປະເມີນເວລາທີ່ໃຊ້ໃນວຽກນັ້ນໆໃຫ້ຫຼາຍ. ດັ່ງນັ້ນ, ອາດຈະເລີ່ມຕົ້ນດ້ວຍການໃຊ້ເວລາສອງສາມຊົ່ວໂມງຕໍ່ອາທິດ, ແລະ ຂຶ້ນຢູ່ກັບສະຖານະການຂອງເຈົ້າ, ເຈົ້າອາດຈະພົບວ່າເຈົ້າສາມາດໃຫ້ເວລາໄດ້ຫຼາຍຂຶ້ນໃນພາຍຫຼັງ. ແຕ່ໃນອະນາຄົດ ເຈົ້າອາດຈະວຽກຫຼາຍຂຶ້ນ ແລະ ຕ້ອງຫຼຸດຜ່ອນເວລາລົງ. ເຊິ່ງມັນກໍເປັນເລື່ອງທີ່ຍອມຮັບໄດ້ຢ່າງສິ້ນເຊີງ. ພຽງແຕ່ຍ້ອນວ່າເຈົ້າສາມາດເຮັດໄດ້ຈຳນວນຊົ່ວໂມງເທົ່ານັ້ນໃນຕອນນີ້ ບໍ່ໄດ້ໝາຍຄວາມວ່າເຈົ້າຈະຕ້ອງເຮັດໃຫ້ໄດ້ເທົ່ານັ້ນໃນເດືອນໜ້າ.

ມັນເປັນສິ່ງສຳຄັນທີ່ຕ້ອງເຮັດຄວາມຮູ້ຈັກກັບອົງກອນ ແລະ ທີມງານທີ່ເຈົ້າສົນໃຈຈະເຮັດວຽກນຳ ກ່ອນທີ່ເຈົ້າຈະພະຍາຍາມເຂົ້າຮ່ວມກັບພວກເຂົາ. ຮຽນຮູ້ວ່າພວກເຂົາເຮັດຫຍັງ ແລະ ເຮັດແນວໃດ, ແລະ ພະຍາຍາມເຮັດຄວາມຮູ້ຈັກກັບຜູ້ທີ່ກ່ຽວຂ້ອງ.

ຢ່າອາຍທີ່ຈະຖາມຄຳຖາມ ແລະ ເຮັດຄວາມຮູ້ຈັກກັບຜູ້ຄົນ. ວາງແຜນທີ່ຈະໃຊ້ເວລາເຂົ້າຮ່ວມການປະຊຸມ, ມີສ່ວນຮ່ວມໃນເວທີສົນທະນາ/ລາຍການອີເມລ (mailing lists) ແລະ ຢູ່ໃນຊ່ອງທາງ Matrix ກ່ອນທີ່ຈະເລີ່ມຮັບວຽກ. ສິ່ງນີ້ອາດຈະໃຊ້ເວລາສອງສາມອາທິດ, ດັ່ງນັ້ນຂໍໃຫ້ມີຄວາມອົດທົນ.

ສະເໜີແນະໃນຫົວຂໍ້ທີ່ກຳລັງສົນທະນາ, ແລະ ແລກປ່ຽນປະສົບການ (ທັງທີ່ດີ ຫຼື ບໍ່ດີ) ທີ່ເຈົ້າເຄີຍມີ ເຊິ່ງກ່ຽວຂ້ອງກັບການສົນທະນານັ້ນ. ແຕ່ຂໍໃຫ້ຈື່ໄວ້ວ່າ ສ່ວນໜຶ່ງຂອງການສັງເກດການ ແລະ ການໃຫ້ຄຳແນະນຳທີ່ສ້າງສັນ ອາດຈະຕ້ອງໄດ້ງົດການຕັດສິນຄົນອື່ນໄວ້ກ່ອນ. ເມື່ອໃຫ້ຄຳແນະນຳ, ຢ່າຄິດວ່າເຈົ້າມີຄຳຕອບທຸກຢ່າງ ຫຼື ຄິດວ່າ Fedora Project "ເຮັດທຸກຢ່າງຜິດໝົດ". ມັນເປັນໄປໄດ້ທີ່ພວກເຮົາສາມາດປັບປຸງວິທີການເຮັດວຽກຂອງພວກເຮົາໃຫ້ດີຂຶ້ນໄດ້, ແນວໃດກໍຕາມ, ວິທີການປະຕິບັດສ່ວນໃຫຍ່ໃນປະຈຸບັນ ແມ່ນໄດ້ຖືກພັດທະນາມາເປັນເວລາດົນນານ ຫຼັງຈາກການສົນທະນາທີ່ຍາວນານ. ຄຳວິພາກວິຈານຂອງເຈົ້າອາດຈະໄດ້ຮັບການຍອມຮັບດີຂຶ້ນ ເມື່ອເຈົ້າໄດ້ສ້າງຕົວຕົນໃນຊຸມຊົນ ແລະ ໄດ້ຮັບການຍອມຮັບວ່າເຂົ້າໃຈວັດທະນະທຳຂອງພວກເຮົາແລ້ວ.

ວິທີການທີ່ດີໃນການໃຫ້ຄຳຄິດເຫັນຄືການໃຊ້ "plussing". ແນວຄິດພື້ນຖານແມ່ນ ບໍ່ພຽງແຕ່ວິພາກວິຈານ ຫຼື ໃຫ້ຄຳຄິດເຫັນຕໍ່ໄອເດຍເທົ່ານັ້ນ, ແຕ່ຕ້ອງສະເໜີຄຳແນະນຳ ຫຼື ວິທີແກ້ໄຂອື່ນໆ ໄປພ້ອມກັບຄຳຄິດເຫັນນັ້ນນຳ.

ໃນ Fedora, ເຈົ້າເປັນຜູ້ຕັດສິນໃຈເອງວ່າຢາກເຮັດຫຍັງ. ພວກເຮົາບໍ່ໄດ້ມອບໝາຍວຽກ ແລະ ໜ້າທີ່ໃຫ້ກັນແລະກັນ.

ໂດຍທົ່ວໄປແລ້ວ ແຕ່ລະທີມຈະມີລາຍການວຽກທີ່ຕ້ອງເຮັດ. ເມື່ອເຈົ້າຮູ້ຈັກກັບທີມງານດີຂຶ້ນ, ເຈົ້າຈະຮູ້ວ່າສິ່ງໃດແດ່ທີ່ຕ້ອງເຮັດ. ໃຫ້ເລືອກສິ່ງທີ່ສຳຄັນສຳລັບເຈົ້າ ແລະ ສິ່ງທີ່ເຈົ້າມີຄວາມມັກ (passion). ນອກຈາກນີ້, ໃຫ້ຖາມຄຳຖາມ ແລະ ທຳຄວາມເຂົ້າໃຈກັບວຽກທີ່ເຈົ້າຈະຮັບ ກ່ອນທີ່ຈະອາສາມັກເຮັດວຽກນັ້ນ.

ມີສິ່ງທີ່ຕ້ອງເຮັດຢູ່ສະເໝີ. ຖ້າເຈົ້າເຫັນສິ່ງໃດທີ່ຍັງບໍ່ຄ່ອຍຖືກຕ້ອງ ຫຼື ສິ່ງທີ່ສາມາດປັບປຸງໄດ້, ໃຫ້ຄົ້ນຄວ້າຂໍ້ມູນ ແລະ ນຳສະເໜີຂໍ້ສະເໜີຕໍ່ທີມງານ. ໃຫ້ຊອກຫາວຽກເຮັດ, ລິເລີ່ມສິ່ງໃໝ່ໆ, ເຮັດໃຫ້ຕົວເອງຫຍຸ້ງຢູ່ສະເໝີ ແລະ ຊ່ວຍເຫຼືອຜູ້ນື່ນ.

ເມື່ອເລືອກວຽກທີ່ຈະເຮັດ, ຢ່າຮັບວຽກທີ່ໃຫຍ່ເກີນໄປມາເຮັດພຽງຄົນດຽວເປັນການປະກອບສ່ວນຄັ້ງທຳອິດ. ການເລືອກວຽກທີ່ໃຫຍ່ເກີນໄປຈະເພີ່ມໂອກາດທີ່ຈະຫຼົ້ມເຫຼວຢ່າງຫຼວງຫຼາຍ. ນອກຈາກນີ້ ກໍບໍ່ຄວນເລືອກເຮັດຫຼາຍວຽກໃນຫຼາຍທີມພ້ອມກັນ. ໃຫ້ເລີ່ມຕົ້ນຈາກສິ່ງນ້ອຍໆ, ເລືອກຢ່າງຫຼາຍພຽງໜຶ່ງ ຫຼື ສອງຢ່າງ, ແລ້ວຈຶ່ງຄ່ອຍໆຂະຫຍາຍອອກໄປ. ກຸນແຈສຳຄັນຄືການເຕີບໂຕຢ່າງຊ້າໆ, ໝັ້ນຄົງ ແລະ ຍືນຍົງ. ຢ່າເຂົ້າຮ່ວມໂດຍມີເປົ້າໝາຍໃນທັນທີວ່າຈະເປັນຜູ້ນຳຄົນຕໍ່ໄປຂອງໂຄງການ :).

ໂດຍພື້ນຖານແລ້ວ, ນອກຈາກຈະມີຂໍ້ມູນສ່ວນຕົວທີ່ກ່ຽວຂ້ອງ, ໃຫ້ໃຊ້ຊ່ອງທາງການສື່ສານແບບສາທາລະນະສະເໝີ. ດັ່ງທີ່ໄດ້ລະບຸໄວ້ໃນ ບົດຄວາມນີ້, ເຊິ່ງມັນມີຂໍ້ດີຫຼາຍຢ່າງ:

ຕົວຢ່າງເຊັ່ນ:

ໃນຊຸມຊົນທີ່ອີງໃສ່ອາສາມັກຄີຄື Fedora, ຄວາມຮູ້ຈະຖືກແບ່ງປັນ ແລະ ຮັກສາຮ່ວມກັນໂດຍຊຸມຊົນທັງໝົດ. ພວກເຮົາບໍ່ຄ່ອຍເປັນທີ່ປຶກສາໃຫ້ກັນແບບຕົວຕໍ່ຕົວ. ບາງທີມອາດຈະມີຮູບແບບການສະໜັບສະໜູນ (sponsorship) ທີ່ສະມາຊິກຄົນໜຶ່ງຈະຮັບຜິດຊອບເບິ່ງແຍງການປະກອບສ່ວນໃນເບື້ອງຕົ້ນຂອງສະມາຊິກໃໝ່. ແຕ່ໂດຍທົ່ວໄປແລ້ວ, ພວກເຮົາທຸກຄົນຕ່າງກໍເປັນທີ່ປຶກສາໃຫ້ກັນແລະກັນ. ດ້ວຍວິທີນີ້, ຈະບໍ່ມີໃຜເປັນຈຸດສູນກາງຂອງການເຮັດວຽກພຽງຄົນດຽວ. ດັ່ງນັ້ນ, ຖ້າເຈົ້າເຫັນໃຜບາງຄົນເຮັດບາງສິ່ງທີ່ເຈົ້າຢາກຮຽນຮູ້, ໃຫ້ເຂົ້າໄປຖາມໃຫ້ພວກເຂົາຊ່ວຍສອນໄດ້ເລີຍ. ໃນທາງກົງກັນຂ້າມ, ຖ້າເຈົ້າຮູ້ວ່າມີວິທີທີ່ດີກວ່າ ຫຼື ງ່າຍກວ່າໃນການເຮັດບາງຢ່າງ, ໃຫ້ຂຽນເອກະສານໄວ້ຢູ່ບ່ອນໃດບ່ອນໜຶ່ງ ແລະ ແບ່ງປັນໃຫ້ກັບຊຸມຊົນ.

ອີກສິ່ງໜຶ່ງທີ່ຄວນຈື່ໄວ້ຄື ການຮຽນຮູ້ໃນຊຸມຊົນອາສາມັກຄີມັກຈະເກີດຂຶ້ນໂດຍການຮຽນຮູ້ດ້ວຍຕົນເອງ. ຜູ້ຄົນຍິນດີສະເໝີທີ່ຈະໃຫ້ລິ້ງ ແລະ ຊັບພະຍາກອນຕ່າງໆແກ່ເຈົ້າ. ແນວໃດກໍຕາມ, ເນື່ອງຈາກພວກເຮົາທຸກຄົນເປັນອາສາມັກຄີ, ມັນຈຶ່ງເປັນເລື່ອງຍາກທີ່ຈະແບ່ງເວລາເພື່ອມາສອນຄົນອື່ນຢ່າງຈິງຈັງ. ດັ່ງນັ້ນ, ນິໄສທີ່ດີຄືການຂໍເອກະສານ ແລະ ແຫຼ່ງອ້າງອີງຈາກຜູ້ຄົນ ເພື່ອໃຫ້ເຈົ້າສາມາດຮຽນຮູ້ໄດ້ດ້ວຍຕົນເອງ. ການອ່ານເອກະສານ (ແລະ ການຮັກສາເອກະສານໃຫ້ທັນສະໄໝ) ແມ່ນທັກສະທີ່ສຳຄັນ. ແນ່ນອນວ່າ ຖ້າເຈົ້າມີຂໍ້ສົງໄສ, ໃຫ້ຖາມແລ້ວຈະມີຄົນມາຕອບ.