Documentation for a newer release is available. View Latest

ການດາວໂຫຼດ Fedora

ທີມງານເອກະສານ Fedora Version F38 Last review: 2023-04-18

ພາກສ່ວນນີ້ໃຫ້ຄຳແນະນຳກ່ຽວກັບວິທີການເລືອກສື່ສຳລັບຕິດຕັ້ງທີ່ເໝາະສົມໃນການດາວໂຫຼດ.

ດັ່ງທີ່ໄດ້ກ່າວໄປແລ້ວ, ເວັບໄຊ getfedora.org ແມ່ນບ່ອນດາວໂຫຼດ Fedora ທັງໝົດ. ໜ້າທຳອິດຈະສະແດງລາຍການ Editions, Spins, Labs ແລະ ອື່ນໆ ທີ່ມີໃຫ້, ດັ່ງທີ່ອະທິບາຍໄວ້ໃນ ການເລີ່ມຕົ້ນ, ແລະ ມີລິ້ງໄປຫາໜ້າລາຍລະອຽດຕ່າງໆ. ໃຫ້ເຂົ້າໄປໜ້າທີ່ກ່ຽວຂ້ອງກັບຮູບແບບ Fedora ທີ່ເຈົ້າຕັດສິນໃຈຈະນຳໃຊ້.

ຕອນນີ້ ເຈົ້າຕ້ອງເລືອກເພີ່ມເຕີມຕາມທີ່ອະທິບາຍໄວ້ບ່ອນນີ້.

  • ສະຖາປັດຕະຍະກຳຂອງຮາດແວ ທີ່ຈະຕິດຕັ້ງ Fedora ໃສ່

  • ປະເພດຂອງສື່ສຳລັບຕິດຕັ້ງ ທີ່ຕອບສະໜອງຄວາມຕ້ອງການຂອງເຈົ້າໄດ້ດີທີ່ສຸດ

ສະຖາປັດຕະຍະກຳຮາດແວ

ເຈົ້າຕ້ອງກຳນົດໃຫ້ໄດ້ວ່າ: ຄອມພິວເຕີຂອງຂ້ອຍໃຊ້ສະຖາປັດຕະຍະກຳໃດ?

ສະຖາປັດຕະຍະກຳຂອງລະບົບແມ່ນຂຶ້ນກັບໂປຣເຊສເຊີເປັນຫຼັກ. Fedora ຮອງຮັບສະຖາປັດຕະຍະກຳ Intel/AMD x86_64 ແລະ ARM aarch64 ຢ່າງເປັນທາງການ. ນອກຈາກນີ້, ຍັງມີສື່ສຳລັບຕິດຕັ້ງ ແລະ ການຮອງຮັບ Fedora ສຳລັບ PowerPC ppc64le ແລະ 'big iron' s390x ໄວ້ໃຫ້ - ເພື່ອເຜື່ອຕ້ອງການ.

ການຕິດຕັ້ງ Fedora ໂດຍໃຊ້ສື່ທີ່ຜິດສະຖາປັດຕະຍະກຳແມ່ນບໍ່ສາມາດເຮັດໄດ້. ກະລຸນາກວດສອບເອກະສານຂອງຜູ້ຜະລິດເພື່ອເບິ່ງລາຍລະອຽດກ່ຽວກັບໂປຣເຊສເຊີຂອງເຈົ້າ.

ຖ້າເຈົ້າໃຊ້ Linux distribution ຢູ່ແລ້ວໃນຄອມພິວເຕີເຄື່ອງນັ້ນ, ເຈົ້າສາມາດພິມ uname -m ໃນເທີມິນອນເພື່ອລະບຸສະຖາປັດຕະຍະກຳຂອງເຈົ້າໄດ້. ຖ້າເຈົ້າໃຊ້ລະບົບປະຕິບັດການອື່ນ, ໃຫ້ໃຊ້ເຄື່ອງມືຊອກຫາທີ່ເຈົ້າມັກເພື່ອຫາວິທີກວດສອບສະຖາປັດຕະຍະກຳໃນຄອມພິວເຕີເຄື່ອງນັ້ນ. ຫຼືອີກວິທີໜຶ່ງ, ເຈົ້າສາມາດຊອກຫາຂໍ້ມູນຮາດແວຂອງເຈົ້າ (ເຊັ່ນ: ລຸ້ນຂອງໂປຣເຊສເຊີ/cpu, ເລກຜະລິດຕະພັນຂອງຜູ້ຜະລິດຄອມພິວເຕີ): ໂປຣເຊສເຊີ/cpu ແມ່ນໂຕກຳນົດສະຖາປັດຕະຍະກຳ.

ຖ້າເຈົ້າບໍ່ແນ່ໃຈກ່ຽວກັບສະຖາປັດຕະຍະກຳຂອງເຈົ້າ, ຄວນເບິ່ງຕາຕະລາງດ້ານລຸ່ມນີ້: ມັນອາດຈະຊ່ວຍໃຫ້ເຈົ້າຮູ້ວ່າເຈົ້າກຳລັງໃຊ້ຫຍັງ.

Table 1. ປະເພດຂອງໂປຣເຊສເຊີ ແລະ ສະຖາປັດຕະຍະກຳ
ຜູ້ຜະລິດໂປຣເຊສເຊີ ແລະ ປະເພດຂອງຄອມພິວເຕີ ປະເພດສະຖາປັດຕະຍະກຳສຳລັບ Fedora

ຄອມພິວເຕີສ່ວນໃຫຍ່ທີ່ໃຊ້ໂປຣເຊສເຊີ Intel ແລະ AMD; ຄອມພິວເຕີ Mac ກ່ອນ Apple M1; ຄອມພິວເຕີປະເພດເຊີບເວີ, ເວີກສະເຕຊັນ, ເດັສທັອບ ແລະ ແລັບທັອບສ່ວນໃຫຍ່; ເນັດບຸກ ແລະ ແທັບເລັດບາງລຸ້ນ

x86_64

ໂປຣເຊສເຊີສ່ວນໃຫຍ່ທີ່ບໍ່ແມ່ນ Intel ແລະ AMD; ຄອມພິວເຕີ Mac ທີ່ເລີ່ມແຕ່ Apple M1 ເປັນຕົ້ນໄປ; Raspberry Pi ແລະ ອຸປະກອນທີ່ຄ້າຍຄືກັນສ່ວນໃຫຍ່; ແທັບເລັດສ່ວນໃຫຍ່; ເນັດບຸກບາງລຸ້ນ

ARM® aarch64

ສຳລັບສະຖາປັດຕະຍະກຳ ARM, Fedora ຮອງຮັບສະເພາະສະຖາປັດຕະຍະກຳ 64-bit, aarch64 ຫຼື arm8, ຕັ້ງແຕ່ລຸ້ນ 37 ເປັນຕົ້ນໄປ. ສະຖາປັດຕະຍະກຳ 32-bit ແບບເກົ່າ, armhfp ຫຼື arm7, ໄດ້ຖືກຍົກເລີກແລ້ວ.

ປະເພດສື່

Fedora ມີສື່ສຳລັບຕິດຕັ້ງ 4 ປະເພດທີ່ແຕກຕ່າງກັນເພື່ອຕອບສະໜອງຄວາມຕ້ອງການທີ່ຫຼາກຫຼາຍ.

ຮູບພາບລາຍ

Live images ("Live ISO") ຖືກອອກແບບມາເພື່ອບູດຄອມພິວເຕີ ແລະ ໃຫ້ເຈົ້າທົດລອງໃຊ້ Fedora ກ່ອນຈະຕິດຕັ້ງ. ແທນທີ່ຈະບູດເຂົ້າສູ່ໂປຣແກຣມຕິດຕັ້ງໂດຍກົງ, Live image ຈະໂຫຼດສະພາບແວດລ້ອມແບບດຽວກັນກັບທີ່ເຈົ້າຈະໄດ້ຮັບຫຼັງຈາກຕິດຕັ້ງສຳເລັດ.

ປະເພດໄຟລ໌ແມ່ນ '.iso'. ເຈົ້າຕ້ອງໂອນໄຟລ໌ນີ້ໃສ່ສື່ທີ່ໃຊ້ບູດໄດ້, ປົກກະຕິຈະເປັນແຟລັດໄດຣ (USB stick), ຫຼື ຊີດີ (CD) ຫຼື ດີວີດີ (DVD).

ໃຊ້ Live image ເພື່ອຕິດຕັ້ງລະບົບທີ່ເຈົ້າມັກ, ທົດສອບ Fedora ກັບຮາດແວໃໝ່, ແກ້ໄຂບັນຫາ, ຫຼື ແບ່ງປັນໃຫ້ໝູ່ເພື່ອນ.

Fedora Workstation, Fedora Spins ແລະ Fedora Labs ບາງລຸ້ນ ເປັນພຽງສອງສາມຢ່າງທີ່ໃຫ້ບໍລິການໃນຮູບແບບ Live images.

ຮູບພາບມາດຕະຖານ

Standard images ("Standard ISO") ຖືກອອກແບບມາເພື່ອບູດຄອມພິວເຕີເຊັ່ນກັນ, ແຕ່ຈະບູດເຂົ້າສູ່ສະພາບແວດລ້ອມການຕິດຕັ້ງໂດຍກົງ. ມັນບັນຈຸໄຟລ໌ທັງໝົດທີ່ຈຳເປັນສຳລັບການຕິດຕັ້ງ ແລະ ບາງລຸ້ນຍັງມີທາງເລືອກເພີ່ມເຕີມ ແລະ ຕົວເລືອກໃນການຕັ້ງຄ່າໃຫ້.

ປະເພດໄຟລ໌ແມ່ນ '.iso'. ເຈົ້າຕ້ອງໂອນໄຟລ໌ນີ້ໃສ່ສື່ທີ່ໃຊ້ບູດໄດ້, ປົກກະຕິຈະເປັນແຟລັດໄດຣ (USB stick), ຫຼື ຊີດີ (CD) ຫຼື ດີວີດີ (DVD).

ໃຊ້ Standard image ເພື່ອຕິດຕັ້ງແບບອອບລາຍ (Offline) ໃນກໍລະນີທີ່ບໍ່ມີອິນເຕີເນັດ ຫຼື ອິນເຕີເນັດຊ້າ ຫຼື ບໍ່ສະຖຽນ.

Fedora Server, Fedora IoT, Fedora CoreOS, Fedora Silverblue, ແລະ Fedora Kinoite ມີໃຫ້ໃນຮູບແບບ Standard images.

ຮູບພາບຕິດຕັ້ງຜ່ານເຄືອຂ່າຍ

Netinstall images ("Netinstall ISO") ຖືກອອກແບບມາເພື່ອບູດຄອມພິວເຕີ ແລະ ເຂົ້າສູ່ສະພາບແວດລ້ອມການຕິດຕັ້ງໂດຍກົງ. ແຕ່ມັນມີພຽງໄຟລ໌ລະບົບຂັ້ນພື້ນຖານເທົ່ານັ້ນທີ່ໃຊ້ໃນການບູດ ແລະ ເຊື່ອມຕໍ່ອິນເຕີເນັດ. ຫຼັງຈາກນັ້ນ, ລະບົບຈະຕ້ອງດາວໂຫຼດໄຟລ໌ທີ່ຈຳເປັນທັງໝົດສຳລັບການຕິດຕັ້ງຈາກແຫຼ່ງເກັບຊຸດໂປຣແກຣມອອນລາຍຂອງ Fedora.

ປະເພດໄຟລ໌ແມ່ນ '.iso'. ເຈົ້າຕ້ອງໂອນໄຟລ໌ນີ້ໃສ່ສື່ທີ່ໃຊ້ບູດໄດ້, ປົກກະຕິຈະເປັນແຟລັດໄດຣ (USB stick), ຫຼື ຊີດີ (CD) ຫຼື ດີວີດີ (DVD).

ໃຊ້ Netinstall image ຖ້າລະບົບມີການເຊື່ອມຕໍ່ອິນເຕີເນັດທີ່ສະຖຽນ ແລະ ມີຄວາມໄວພໍສົມຄວນ. ການຕິດຕັ້ງນີ້ຈະເຂົ້າເຖິງການອັບເດດລ່າສຸດໄດ້ທັນທີ.

Netinstall images ໃນປັດຈຸບັນມີໃຫ້ສຳລັບການຕິດຕັ້ງ Fedora Server ເທົ່ານັ້ນ.

ຮູບພາບດິດລະບົບໄຟລ໌

Disk images ຈະສະໜອງໄຟລ໌ລະບົບທີ່ ຕິດຕັ້ງ ແລະ ຕັ້ງຄ່າໄວ້ລ່ວງໜ້າ ເຊິ່ງພ້ອມໃຊ້ງານສຳລັບສະພາບແວດລ້ອມການເຮັດວຽກສະເພາະ ເຊັ່ນ: ເຄື່ອງຈັກສະເໝືອນ (Virtual Machine), ລະບົບ Cloud, ຫຼື ຮາດແວສະເພາະ ເຊັ່ນ: ຄອມພິວເຕີບອດດຽວ (SBC), ຕົວຢ່າງເຊັ່ນ Raspberry Pi ຫຼື ອຸປະກອນອື່ນທີ່ທົດແທນກັນໄດ້.

ປະເພດໄຟລ໌ສ່ວນໃຫຍ່ແມ່ນ '.raw' ຫຼື '.qcow2'. ເຈົ້າຕ້ອງໃຊ້ໂປຣແກຣມຕິດຕັ້ງສະເພາະຂອງສະພາບແວດລ້ອມນັ້ນໆ, ເຊິ່ງອາດຈະມີໃຫ້ໂດຍ Fedora (ເຊັ່ນ: ໃນກໍລະນີຂອງ SBCs) ຫຼື ໂດຍຜູ້ໃຫ້ບໍລິການສະພາບແວດລ້ອມນັ້ນໆ (ເຊັ່ນ: ລະບົບ Cloud ຕ່າງໆ ເຊັ່ນ Amazon AWS).

ໃຊ້ Filesystem disk image ຖ້າເຈົ້າຕ້ອງການນຳໃຊ້ໃນສະພາບແວດລ້ອມການເຮັດວຽກທີ່ກຳນົດໄວ້.

Want to help? Learn how to contribute to Fedora Docs ›